الاثنين، 15 ديسمبر، 2008

بالجزمة !

بوش شاحوه بجوتي
صج عراقيين ما منهم فايدة

بس هذا مو موضوعنا خو 300 مدون بصفاة المدونيين الكويتية كاتبين عنه
توني راد من الاجازة فشوية خفايف

وأشار الملا إلى أن اللجنة ان ناقشت موضوع الخبر وجرى إقراره ( فسأعلن استقالتي
مباشرة من اللجنة كي أعرف السر وراء ديمومتها حيث كنا نعتقد أنها تقوم بممارسات
مخالفة للدستور ونريد أن نتأكد من أنها ليست كذلك وإذا طرح مثل هذا المقترح فهذا
يعني أن اللجنة تخالف الدستور )


شنو تبي بالظبط ؟ الحين انت داش تتأكد من انها ما تسوى مخالفات دستورية ( شنو هالعذر يديد ! انا خابر بتخرب )
بعدين انا مو خبير دستوري بس علي علمي انت مو نصاب و مو بحاجتك حق النصاب و استقالتك ما تسوي شىء
خل يجابل الرياضة جزاه الله خير ابرك

احمد الصراف
طاب بالاسلاميين ، هل ما عندة شىء ثاني يكتب عندة
بعدين احد يشرح اي هذا

ملاحظة: اضطررت يوم امس الاول الى ركوب «الكويتية» من دبي الى الكويت بسبب الارهاق
وروعة الخدمة استغرقت في نوم عميق طوال الرحلة، واثناءها علمت أن شركة DHL
الاميركية العملاقة لنقل البريد اعلنت، بسبب الظروف المالية الصعبة التي تمر بها،
وقف كل عملياتها التي تشمل استلام وتسليم مئات ملايين الطرود يوميا من مئات آلاف
العملاء، وتسليم العملية برمتها لاسطول الخطوط الجوية الكويتية لتقوم بالمهمة بدلا
عنها، ووصلت الطائرة الى الكويت متأخرة نصف ساعة عن موعدها وانتهى الحلم الجميل


نكته بالضبط ولا شنو ؟
او يبي يقول انه ما يركب الكويتية إلا مضطرا و انه توي راد من دبي ؟ ضراط يعني ؟

الاجازة و ما ادراك ما الاجازة
الحين من صجها الحكومة تبينا نداوم الاحد و نعطل الاثنين بعدين نداوم الثلاثاء و الاربعاء و نعطل الخميس ؟
حتي لو اك مزاج ما تداوم شنو ها التخلف
ادمجهم و فكنا

ملحوظة :
الاخوة المدونيين و المعلقين بالمدونة
اسفيين علي الاطاله في الرد بس الاجازة حلوه
و الديوانية طلعت تلش الصراحة

الخميس، 20 نوفمبر، 2008

بتحطو نفسكو بمواقف بايخة

يعني الصراحة الحكومة ما عندها سالفة

الفالي علية منع دخول ؟ علي نفس الطيارة التي دخل فيها ، حق من حقوق الدول و كلها تسوية

ناس تبية يدش ؟ دشو اجراءات الدولة و شيلوا منع السفر
حاسين ان الإجراءات مطولة ؟ قلعة حسوا بالي نحس فية كل يوم و اشتغلوا علشان تقلصون الزمن مالها
ما ذبحنا إلا تطوف الحكومة هذا ، لو الكل يدش نفس الإجراءات كان تغيرت وايد اشياء
بس لان ناس ما عمرها سوت هالاشياء او مرت عليها ماقي اي رغبة حقيقية بالتغيير
يعني لو الوزير قبل ما يصير وزير متملطش و اهو مثلا يحط تلفون كان اول شيء يسوية انة يضبط الخمة الي تحتة لما يصير وزير مواصلات ( لو انا اصير وزير الخيازريين ما توقب تيبب علي ظهور بعض الناس )

انا مستغرب و منصدم من موقف بعض الناس انهم يبون حل المجلس و تعطيل الدستور
لما تلومون المجلس ليش ما تلومون الحكومة اول
هل الحكومة انتجت ؟ هل الحكومة سوت شيء فية القيمة ؟



خبر من ديوانية عروقها بالماي
الامير بيحل المجلس اليوم ( الخميس ) باليل ، امس كان بمزرعة بالعبدلي

الاثنين، 10 نوفمبر، 2008

دستور يا اسيادنا


يوم 11 - 11

شباب صوت الكويت تعد لإحتفالية بيوم الدستور
فرحانين فية مساكين بعد ما بقي شىء ينفرح فية هالايام
بنك طايح و الحكومة مستذبحة تنقذة و المشكلة من اصحابه مقامرين
شركات استثمار صافة دور تبي فلوس من كيس الحكومة و المشكلة استثمار تعبان منهم
ناس تنعطي جنسية و بعدين تنسحب لو مو معطينهم اشرف لنا و لهم
حكومة تعدل و تصحح بعد ما هددت بالاستجواب ( من نائب بلا دعم و بلا تيار و بلا كتلة ..... )

عاد لما الصراف بالقبس متحمس لشيء فهاذا دليل عندي على توجهه و ياليت ( ولو اني استبعد انة يصير ) ان المنظمين يصرحون انهم مالهم شغل بأحد
مو عقب يومين يطلع لي واحد و يقول التيار الوتني حشد الألوف

الثلاثاء، 28 أكتوبر، 2008

هو انا لاقيها منك ولا منه !!

الديره عفسة
مو شىء جديد الصراحة

بس في شىء الصراحة يحر
ليش صرنا نسايين ؟ ما اسرع ما ننسي

تذكرون حسين الفضالة ؟ صار له 117 يوم و لا خبر
تذكرون شلون الناس صفقت حق قوانين الرياضة ؟ الحين صار مرزوق كخة ؟

الحين الناس بتنسي المصفاة الرابعة
الحين الناس بتنسي الرياضة
الحين الناس بتنسي التربية و التعليم العالي

انا اموت و اعرف متي الوقت مناسب ؟ ممكن الناطق الرسمي للحكومة ( حسب علمي هو فيصل حجي بوخضور و الشغلة الغريبة انه اقل وزير يصرح ) يعطينا جدول زمني قبل كل دور انعقاد ؟

و اعذار الحكومة زاهبة ما شاء الله

من 1980 - 1988 حرب العراق ايران
من 1992 - 2003 جار الشمال متربص
من 2003 - 2007 ايران و مشاكلها مع الطاقة الذرية
من 2007 - اليوم المشكلة الاقتصادية

و الحين رئيس الوزراء خط احمر ( ما ادري ليش ؟ اخر صورة له وجهه عادى )

شكلهم ناوين على المجلس

الثلاثاء، 14 أكتوبر، 2008

تلت التلاتة كام !

احلي شىء بالدوام من صباح الله خير نجرة

يعني قاعديين نتريق و الجماعة بنكي احسن من بنكك
شلون بنكك ؟ عندكم ملكية ؟
الى يسمع يقول البحر و المخيزبم يسولفون
اقصاة واحد عنده اسهم بـ 3000 دينار بالتمويل و الثاني حساب الجوهرة ما ادرى المليونير
نفس لما واحد يقولك فريقي بط فريقك بالبطولة الاوربية و اخرها ليفربول باط ميلان
شكو ما ادري

المهم النجرة على منو مسوي ارباح اكثر
واحد يقول الوطني و الثاني يقول التمويل
لما مشجع الوطتي قال ان الوطني حقق ارباح اكثر بـ 20 مليوم من التمويل
صراحه كان شكلها قوية
و بتاع التمويل بغي يزنطه
طلع الجريده ( ما غيرها الجريدة ، جريدة الجريدة ) و شنو مكتوب بالصفحة الأولي

بلغ نصيب بنك الكويت الوطني منها 243,7 مليون دينار عن الاشهر التسعة الأولى من عام
2008 مقابل 220,5 مليون دينار عن الفترة نفسها من عام 2007، أي بزيادة قدرها 10,5%،
وارتفعت الإيرادات التشغيلية للبنك إلى 393 مليون دينار مقابل 339 مليونا عن العام
السابق.
اما أرباح بيت التمويل الكويتي (بيتك) فوصلت الى 220.59 مليون دينار
بزيادة 25% عن الفترة نفسها من العام السابق، وارتفعت ربحية السهم إلى107 فلوس
مقارنة مع 89 فلسا للفترة نفسها من العام الماضي بزيادة بلغت 20%.


احنا تنحرنا
التمويل محقق ارباح اقل من الوطني ؟ ما اذكر صارت من قبل
الاخ مال التمويل نط و قال كذاب !!
و يطلع الوطن

أعلن رئيس مجلس الادارة والعضو المنتدب في بيت التمويل الكويتي- بيتك - بدرعبد
المحسن المخيزيم أن -بيتك - حقق أرباحا اجمالية في نهاية الربع الثالث من العام
الجاري قدرها 463.42 مليون دينار( 1740.06 مليون دولار)، مقارنة بأرباح اجمالية
قدرها 393.46 مليونا (1478.06 مليون دولار) للربع الثالث من العام الماضي


فرق فوق الـ 200 مليون اهنى احنا قلنا ولين ردينا على الوطنيين و المو وطنيين

بعدين تفاجئنا بهالخبر فى الجريدة ( ما غيرها الجريدة ، جريدة الجريدة )
http://193.200.40.42/aljarida/Article.aspx?id=81374

أعلن رئيس مجلس الإدارة والعضو المنتدب في بيت التمويل الكويتي–بيتك– بدر عبد
المحسن المخيزيم أن «بيتك» بتوفيق من الله تعالى وكرمه حقق أرباحاً إجمالية للربع
الثالث من العام الجاري قدرها 463.42 مليون دينار (1740.06 مليون دولار أميركي)،
مقارنة بأرباح إجمالية قدرها 393.46 مليون دينار (1478.06 مليون دولار) للربع
الثالث من العام الماضي، وبنسبة نمو 18%


شنو ؟

بابا ما تعرف تكتب خبر لاتكتب
بالاولى تقول 220 و الاقتصادية 463
شنو لعب يهال ؟

ما اقول إلا تفو على الجرايد ، ما نثق فيهم ارقام بعد

الأحد، 5 أكتوبر، 2008

انا قصدى شريف يا فندم

الصراحه الجرايد تفشل
انا شكو الصفر غرزت سيارته ؟

مو بس هذا لا و يضغطونه بالخبر ؟ ما صار خبر و لا جريده صارت قعدة بالديوانية
مو ناقص إلا يكتبون شوف خشمك .....

ليش جرايدنا مو مستوى ؟ الوطن يضغطون بالعالم و الجريدة على الماية عليهم عليهم معاهم معاهم
القبس لاعبين فيها زلمات عالم اليوم ما عندها إلا حدس الرأى ضايعه بالطوشه يوم تحرص على القيم و الاسلام و يوم طاف
الدار اخبار شيعه النهار اعتقد اوفر على بو خمسين ان يوزع بوستر بصورته كل يوم
الشاهد اخبار بلا مصداقية و خرابيط على كيف كيفك
السياسية اخبار سوريا و لبنان فيها اكثر من صحيفه تشرين

الصحيفه الوحيدة المسكينه ؟ الانباء
ما احد يقراها و لا لها بالعير و لا بالنفير ، و كتابها مساكين لا يلاشطون بالعالم و لا شىء

الخميس، 25 سبتمبر، 2008

ألله ! دة حرامى كبير قوى

مع الاسف ما يدزون لى رسائل إلكترونيه و لا فى قائمه الوطنيين

بس اخر مره سمعت ان جريدة الوطن و الى يكتبون فيها مو وطنيين

الحين محمد مساعد الصالح يبقابلونه قناة الوطن
http://www.alwatan.com.kw/ArticleView/tabid/263/Default.aspx?article_id=449026

بس محمد الصالح يكتب بالقبس يعطنى وطنى
بس يقابلونه الوطن صار مو وطنى

شلون الحين ؟ فى احد يقدر يسأل الوكيل الحصرى ؟

الثلاثاء، 23 سبتمبر، 2008

الى شبكنا يخلصنا

حوسه مذكرات الخطيب مو مشتهيه تنتهي

ناس مخونه ناس
و ناس شماتة
و ناس مالهم سالفة حاشهم طشار

بحطها بنقاط عسى الناس تفهم المشكلة ( سأقوم بتحديثا غدا )


13 من سبتمبر
- بنت الخطيب ترسل بريد إلكتروني إلى مدونين ( مقهور و نيو )
( مقهور نشر النص فيما بعد ، نيو يقول بأنه وصله بريد إلكترونى و لكن ليس بنفس الصيغه )

14 من سبتمبر
- الوسمى فى اتصال خاص مع الان يقول
أما العبارات والكلمات التي وردت في مسودة المذكرات التي تنشر على حلقات فلم
تكن صحيحة


15 من سبتمبر
ازيولايك ينشر متحدثا من ان ما تنشره الجريدة هو مسودات

مقهور يكتب من أن المسودات تم الحصول عليها بشكل غير اخلاقى ( سرقه )

- مدون بأسم الصقر ينشر نفس الرساله التى وصلت مقهور ثم يمسحها و يقول انه تم اختراق معرفه
و انه لم يحصل على نفس صيغه مقهور


كراكاتوا ايضا يكتب ان المذكرات تم الحصول عليها بشكل غير اخلاقى


17 من سبتمبر

نيو يعيد نشر تنويه الخطيب من أن النشر تم بالاتفاق معه

ساحه الصفاه تعتبر المتحدثين فى امر المذكرات مشتطين و مطبلين


18 من سبتمبر
نيو يطالب بدليل
ساحه الصفاه يطالب بدليل ايضا

19 من سبتمبر
نيو يعيد نشر تنوية جريدة الجريدة و يعتبره الدليل الاعظم انه محق


21 من سبتمبر
مقهور ينشر كل الرسائل التى وردته من بنت الدكتور الخطيب

الزبدة ؟

الخطيب بيسوى فلم
قام استغل مدونيين ( مقهور ، حاكى عقالى ، كاركاتوا ، مهندس كويتى ، ازيولايك ، الزومبى السابق )
جريدة الجريدة ردت بإستخدام مدونينها ( مثل ساحه الصفاه ، ام صدة )

و الخطيب ربحان سوا ضجه
لا تقولون مو معقول يشوه تاريخه
خل نكون واقعيين
شلون يتشوه ؟
فى ناس تشوفه صنم يعبد لا يخطىء لدرجه انهم مصدقيين انه الكل بالكل حتى انه يمون على صدام و الخمينى و فرنسا و روسيا
و فى ناس ما تواطنه مره واحده ( لأسباب متعدده )

فهال فلم مو فارق
الطرف الاول للحين تعبده
و الطرف الثانى ما تحبة

و هو الربحان ، زاد الاهتمام بكتابة و الناس تبو تشوف شنو انشال و شنو اضيف

الاثنين، 15 سبتمبر، 2008

مش انا ! دا اخويا الى عملها

بعد ما صارت الصجيه
و اعترضوا العوازم و قامت تطلع الاشياء الخاطئه ( لأن الناس الى صارلها هالاشياء عايشه للحين )
كويتيون : العــوازم ومذكرات الخطـــيب

فالصراحه هذا يخلنى اشك بكل ما سبق
لان اول ما بدأ بالاحياء طلع الفشنك كله
عيل الى قاله عن ناس ميته فشنك مثله


طبعا بعد هذا طلعت لنا سالفه جديده

مذكرات السوبرمان مسروقه

شلون مسروقه ما ادرى

لو منشوره على النت افهمها
بس جريده و لها مالك و محررين و عنوان و ترخيص يبوقون ؟
لا و يقعد ساكت فوق الـ 15 يوم ( هذا غير اعلانهم انهم سينشرونها )
ما تنبلع

مدونون يقولون انها مسروقه
مقهور صيغة المناشده للدكتور احمد الخطيب
كراكاتوا هل يجوز هذا...يا جريدة الجريدة
از يولايك مذكرات الخطيب .. أم مذكرات الجريدة ؟
مهندس كويتى عشان اتعرف منو الوطني يا دكتور احمد الخطيب

مع انى اقدر كل هالمدونين ترا السالفه ما تنبلع

الخميس، 11 سبتمبر، 2008

انا كل حاجه و انتو ولا حاجه

مع الاسف هذا الشىء الوحيد الى اي شخص عاقل يقرأ مذكرات الخطيب يستنتجه

قرأتها من اول رمضان ابى مره يقول ناس سوى شىء ايجابى و ما كنت موجود مالقيت
حتى بالسلبيات يبى يدرئها عنه

نشطنا إعلامياً وقد نظم أحد الإعلاميين برنامجاً عن الاحتلال، واشتركت في مقابلة مع
آخرين مدتها ساعتين، اختصرها إلى نصف ساعة ونشرها دون الرجوع إليّ مع أننا اتفقنا
على ألا ينشر المقابلة قبل الرجوع إليّ. وكانت النتيجة أن جاءت المقابلة مشوهة أدت
إلى انتقاد بعض الذين شاهدوا الحلقة. وقد حذف كل الكلام الذي قلته عن ممارسات صدام
في الكويت. وكنا في ذلك الوقت تحت احتمالات سيئة لو قامت الحرب فأهلنا في الكويت
معرضون للإبادة لأنهم بدون حماية. ولذلك كان الرأي أن خيار الحرب ليس هو الخيار
الأول وأنه لا بد من وجود وسائل تحمي الشعب الكويتي كما هي عند القوات العراقية
وقوات التحالف


كأنه ما سوها

كل المذكرات انا انا انا انا
يرحم والديك
حتى اشهر شهيده فى الغزو " أسرار القبندي " كانت تدق عليه تلفون
إلى الحين ما وصل الى حرب التحرير
ان شاء الله ما يطلع انه داش برشاش بروحه و مطهر الكويت من العراقيين

من سوء حظ الوتنيين انه بطلهم القومى ، لانه مو طبيعى و شكله ماكو شىء بيطلع مثله


الاخ جار البارتيشن قال

أجمل منك لم تر قط عيني وأكرم منك لم تلد النساء
خلقت مبرءًا من كل عيـب كأنك قد خلقت كما تشاء

يقول انقالت بالرسول صلى الله عليه و سلم

الأحد، 7 سبتمبر، 2008

أهلا رمضان ! رمضان جانا !

اول شىء مبروك عليكم الشهر و ما تبقى منه

الصراحه مو ملحقين حق تصفح مدونات برمضان
نداوم 9 و نمشى الساعه واحده
تيي الصبح ، سلام وراه سلام
تصبح بالخير على المدير
تصلى الظهر
تمشى

مراجعين مالهم خلق
موظفين ماكو زقاير مالهم خلق
موظفين ماكو قهوه مالهم خلق
و القائمه لا تنتهى

المهم
قد اقلل المواضيع برمضان و قد ازيد
يعتمد على الشباب اذا ما طلعو اجازات و حذفوا شغلهم كله على

الأربعاء، 20 أغسطس، 2008

حرامى ! حرامى ! الى يحب النبى يضرب !



المصفاه الرابعه !
الشغل الشاغل للكويتيين
انا الصراحه ما ادرى نحتاجها او لا
بس الشعيبه كل شوى منفجر فيها شىء اتوقع صينت من زمان ( يا ليت واحد يقول متى انبنوا )




اولا ( حلوه اولا يعنى طالع فيها بقول نقاط )
شفيهم النواب كلمن نط السور و قال حرامى ؟
الصرحه لما نواب اول مره و كل واحد صاير لى رامبو
و يهدد انه يستجوب
تحس ان السالفه مالها سالفه
مجرد تسجيل موقف و ترزز
شكله اول يوم دام بالمجلس هواش عند علام الكندرى منو يسلم اول




ثانيا


لما السعدون يطلع و يقول انها سرقه و يلعب بالوقت الضايع ( اى ما تكلم عنها من قبل لا هو ولا مسلم البراك )
اهنى انا استغرب و اتعجب
شنو ما بين إلا الحين ؟
ما رفع نواف الفزيع قضيه ؟ شنو صار فيها ؟ مو قالوا ماكو شىء ؟
ليش لو كان فى شىء من قبل كان تحركوا و قدموا الاوراق يوم القضيه ؟
شنو السالفه حرام اللعب كفريق لازم كل واحد بروحه يطب سلايت ؟




ثالثا


ما صار ديوان محاسبه ؟


كل شوى محولين عليه شىء
الظاهر الطبيات و الاجازات تتحول عليه بعد ما تمر على ديوان الموظفين ( كأنهم يم بعض ؟ )
يا اخى شنو هالخرابيط بالديره
" اننا نثق بإجراءات ديوان المحاسبه "
ليش ملائكه يشتغلون اهناك و انا ما ادرى ؟




رابعا


انا الصراحه كاسرين خاطرى الاخوان ربع جمعيه الاصلاح
طبوا مع الصبيح خسروا و التحالف فاز
طبو مع نوريه خسروا و التحالف فاز
الحين يطبون مع العليم و يخسرون و التحالف يرد يفوز
صج مساكين

ولا احد يقول لى مع مصالحهم شنو الى بالمجلس الحين حاطيين نصب اعينهم مصلحه الكويت ؟


تعليق


عبداللطيف الدعيج طلع خليفه شارلك هولمز المحقق الفريد

اذا تبون تعرفون منو يمه ، هذا يكتب بالقبس و مقالاته معلوماتها بايخه مثل ويهه و كله حاط على تيار واحد بالكويت

الاثنين، 18 أغسطس، 2008

ياابنى فهمى البلوغ يبقى ايه ؟ كتاب شيعى ؟

قبل ما احد ينط الطوفه و يقول يالطائفى
اقرأ مقاله عبداللطيف الدعيج بالقبس

قرأتها ؟ زين
الحين الاخ الظريف سوى المدونيين شيعه و ليبراليين ليش ؟ لانه يبى يسويهم ابطال
عباله انه يساعدهم مع انه بإستهبال واضح يضرهم

لما يكتب ان الشيعه قبل كانوا موالين السلطه و الحين شبابهم معارضيين شنو بيوصل له ؟ ان الشيعه قاعدين يكفرون عن ذنوبهم مثلا ؟
كتب اسماء 5 مدونات شيعية خلاص صاروا اغلبيه ؟ انا اكتب 7 سنه شنو يعنى ؟ و واحد يكتب 9 مدونات بدو يصيرون اغلبيه ؟
بعدين اى شخص لو يأخذ فره صغيره على المدونات ما يلاقى تيار عام اصلا
فهناك الليبرالى و الاخوانى و السلفى و الزقمبى و المو تنى الخ من تعددات و تيارات
و فى الحقيقه لا يمكن انك تصنف التيار الغالب على المدونيين لان كل واحد عنده تصنيف من كيفه

من الليبراليين ؟ محد يعرف او مافى تعريف دقيق
هل هم ربع الصقر ؟ السعدون ؟ النصف ؟ حسن جوهر ؟ سعود الخال ؟

بعدين شنو سبب ان فى ناس ( يغلب عليها الاتجاه الليبرالى ) قاعده تلمع حق الشيعه ؟
مثل الدعيج فى المقال اعلاه و مثل ايمان البداح فى الجريده و احصائات ما ادرى من وين طالعه
شنو اغلب الشهداء و الصامدون شيعه ؟ من وين طلع الرقم !

لازم يعنى الناس تبحث و تدور و نفرز الشهداء و الاسرى شيعه و سنه و حضر و بدو و عبال الجهراء ؟

و يقولون احنا طائفيين !

حسن جوهر بيستجوب نوريه الصبيح انا اتحدى اكبر شنب يطلع و يقول ان الاستجواب له نفس طائفى نفس ما شقونا بسالفه الخليفه مال الصحه شخص صار له مليون سنه وكيل و لا راضى يطلع و لا انجاز و لا تبن
بس كلما قرب منه واحد اشتغلت الجوقه
" يا طائفى " , " هازا ما يجوز هازا ولد زين " ، " يو از رايسست " <--- هذا مدرسه امريكيه
محد طائفى إلا الى يستهبلون بالدفاع عن الشيعه و محد ضار الشيعه إلا عيالها بإنكفائهم و اعتزالهم


خارج الموضوع : الاخ الصراف رد على طير يلى
عفوا شكوا بالمجتمع حطت صوره حريم او ما حطت ؟ المشكله ان نص المقال راح على ولا شىء
شنو الى استفدناه من المعلومه ؟ ولا شىء

الخميس، 14 أغسطس، 2008

كم مر على حسين فى ايران ؟

واحد من الشباب ما قصر معاى بالدوام

ضبط العداد الى تشوفونه بالجنب
دورنا على برنامج و حطه بالمدونه الى تشوفونها

و البرنامج على قولته سهل

إذا تستعمل موقع بلوغر
ادخل على تخطيط
بعدين
اضافه اداه
وراها اختار
HTML / JAVASCRIPT
و انسخ الكود هذا

الأربعاء، 13 أغسطس، 2008

ايه دول ؟ شويه خرفان و معيز عاملين نفسهم حاجة

مع الاسف واضح ان هذه نظره العديد من يعتبرون كويتيون الى اخوانهم الباقيين

انا مانى فاهم
مدونين كتبوا ( يوم نست الجرائد ) عن مواطن كويتى حابسته دوله اخرى بغير وجه حق ( محنا قايليين اختطاف يزعلون بعض الناس )
قاموا الناس كلمن ينط الطوفه و طاحوله تحذف بيض و طماط خايس

اولها بدوها بالتشكيك بالقضيه من الاصل

الى يقول تره مهرب
والى يقول جاسوس
والى يقول اهله مصيفين

يوم طلع كل هذا فاصو شنو قلبوها ؟

انتوا طائفيين
احنا نياده بس ندافع عن ايران ( شلون ما ادرى الزمن غدار و الحكمه تقول ترسه فول )
انتو ما تعرفون تكتبون شىء و فاشليين لانكم تسوون بوستين كل يوم
انا ما اقرى جرايد بس افهم من د. النفيسى فى السياسه
احنا دوله زبوطه مالها سالفه

بعدين شكلهم غيروا الاستراتيجيه
من طز فيكم و فيه ( شكو ما ادرى )
الى اها هازا انت خاروف

شكو ما ادرى

قريت مدونه كاتبه ( او كاتب ما يندرى عالانترنت )
ان الخرفان قاعديين يهاجمون ايران و ان ما عندهم سالفه
ليش ما ادرى ؟ منو الى عينها مفتش جواخير

ما ادرى ليش اذا تكلمنا على ايران صرنا طائفيين
اذا هذى القصه فإنى اطالب ان الصراف و عاب و باقى شله حسب الله بالقبس انه ولا كلمه عن الاخوان او السلف
او ان السالفه ناس و ناس ؟

الخميس، 7 أغسطس، 2008

جيبو ابننا و خدو شويه بنغالية بداله

مع الاسف ولدنا الفضاله ما زال فى ايدى الايرانيه

خلصت المناورات شنو ترقيعكم يالمرقعشيه الان ؟

او انه الى الحين عيب ننتكلم عن ماما ايران ؟

ترى المواطن قيمته من حرص الحكومه عليه
يعنى اسرائيل ليش قيمه مواطنينها وايد ؟ مبدله جثتين بـ 5 محكوم عليهم مؤبد و فوق الثلاثين جثه
يا اخى وروهم العين الحمرا ؟ ليش ماكو سعوديين مختطفين ؟ لان ايران ان سوتها ما تشوف الحرم تدرى ماكو نكت هناك

مو احنا حتى البغاليه مدلعينهم ، الحبيب الى عندى ما يرد على هالايام ، شاى صارله ساعه و ما يابه الا لما صدته مودى شاى حق مصرى
و قلتله وين الشاى ؟ كل هذا علشان ما ازفه ، مادرى لازم اصير نغل و اشخل فيه و امسح بكرامته بالارض علشان يصير خوش ولد معاى ؟

انا اقول نقول لإيران ترد ولدنا و نعطيها 300 بنغالى بداله اولهم غلام الى عندى

الاثنين، 28 يوليو، 2008

الافلام من مقالات البوم

بعد الجوله اليوميه فى تفلل الجرايد شفت وايد افلام
بعد التفكير مده فى اي من الافلام اكتب عنه قلت بالاخير اكتب عن كل واحد شويه
او على قوله زميل البارتشن ( من كل بستان زهره )

- الفلم الاول
عبداللطيف الدعيج من القبس
http://www.alqabas.com.kw/Article.aspx?id=416790&date=28072008

كنا نتوقع هذا من اعضاء مجلس الامة، فتسعة وتسعون وتسعمائة وتسعة وتسعون
في المائة منهم على علمنا وخبرنا، معادون للحريات وعلى عداء للمبادئ الديموقراطية
واعتداء على المواد الدستورية التي تكفل الحريات بشكل خاص، كنا نتوقع مثل هذا
المشروع من اعضاء مجلس الامة.


99,999% معناه ان مافى إلااقل من نص نائب يحب الحريات
ياليت جزاه الله خير يحدد منو هالنائب الى بس شويه منه يحب الحريات
( الاخوان بالمحاسبه يوقولون 1 تقسيم 50 يعنى واحد من 50 نائب تساوى 0.002 بالمائه )

الفلم الثانى
علي أحمد البغلي ايضا بالقبس
http://www.alqabas.com.kw/Article.aspx?id=416791&date=28072008
ولكن ما شكل الصدمة الاكبر لنا ولجميع المراقبين هو ان احدا من «لظس» لم ينبس
ببنت شفه عن تلك المعضلة والمظالم الكبرى التي يتعرض لها اخوان لنا في الانسانية
والدين!! فهل المتاجرة بالبشر واستغلالهم لا تشكل ظاهرة سلبية لدى لظس؟

الحين مو مشكله اظس على قولتكم ؟ ( شنو عيب نقول الاسم الكامل لأى شىء لازم نختصر ؟ ) انهم يتخلون فى امور الدوله ؟
و انهم يتخالون صلاحياتهم ؟
هل هذا تحريض على الاختصاصات ؟ الحين عاب ( كيفى بختصر شنو بس اهوا ؟ ) كل محتج على لظس و اخرتها يطلب منها التدخل ؟

بعدين زميل البارتشن يقول ان ثوره العمال ليست ظاهره دخيله
يقول الخبابيز الايرانيين اضربوا عن العمل قبل

الفلم الثالث
فؤاد الهاشم الوطن
http://www.alwatan.com.kw/Default.aspx?MgDid=655160&pageId=163
«شخصية كويتية نافذة» طلبت من «جنرال» امريكي يعمل ضمن قوات بلاده في العراق ان
«يعرقل» دخولي الى بلاده، وان امكن، يتم ترحيلي ـ مرة اخرى ـ الى الكويت على نفس
الطائرة الكويتية التي كانت ستقلع بعد وصولها بحوالي ست ساعات!!


يرحم والديك لا تسوي لنا افلام
كلمن سافر امريكا تنطع على المطار
منت اول و لا اخر واحد
فكنا من سالفه مصدر مسؤول و متنفذ
اقصاك كاتب مقالات

الأحد، 27 يوليو، 2008

ده القانون كويس ما يخرش الميه

اعتقد حسب خبرتى البسيطه انه هذا اول شىء سمعه المسؤول لما سلموه هذا القانون
تجريم تجريم تجريم
يا حب هذا الديره للتجريم

انا اتمنى لو الحكومه تحاول تطبق 50% من قوانينها
ما راح تقدر لأن فجأه راح تحتاج فوق 50000 كويتى كلهم يتمتعون بالضبطيه القضائيه
و بالمناسبه عن الضبطيه القضائيه
هل فى احصائيه حق منو عنده ضبطيه قضائيه لاننا كأننا متوسعين فيها
لما يطبق القانون سالف الذكر هل راح يصادرون الكمبيوترات فى البيوت ؟
و يطلعون رخص مثل كوبا ؟
العالم يطلع الى الامام و احنا نقحص ورا

نص هذه الجرائم لا يمكن اثباتها
و إلا كانوا الامريكان سابقينكم


معلومات اخرى عن القانون الطيب الذكر

الشيخ ازيولايك
http://q8p.blogspot.com/2008/07/blog-post_27.html

كراكاتووا الكويت
http://krakatoa-q8.blogspot.com/2008/07/blog-post_27.html

الأربعاء، 23 يوليو، 2008

من حبنا لها ننشوى فيها

يوبا والله العظيم نحبها وايد وايد وايد

بس ليش لازم نطفى المكيف علشانها ؟
شنو هالافكار العبقريه
الله يهدى الى ماسكين مشروع ترشيد ( او يأخذهم حسب اتجاهك الفكرى هذى الايام )
يقولك تخفيض حراره المكيف يوفر بالطاقه

نسو يذكرون انه هذا ممتاز للى يسافر مو القاعد بالمكيف
انشوينا
و الاخ المتين بالقسم صار فسيخ
و العصير صار مو شى طعمه بعد 5 دقائق بالمطبخ


شعار الحمله القادم لازم يكون
من حبنا لها ما راح نصيف فيها
و نحط خصومات على التذاكر و الفنادق


بس السنه اشوف ان المشكله من عطل بالمولدات صارت بالكيابل و المحولات
و هل لازم تصير ازمه علشان نصلح ؟ ليش ما الكيابل و المحولات تصلحت قبل ما تخترب ؟

الأحد، 20 يوليو، 2008

الخرفان و الحمير

مشكلة الكويت الازليه

مافى تنوع
اما خرفان كويتيه
او حمير مصريه

طبعا الحين واحد ينط و يقول شنو هازا طائفيه او هيدا عنصريه او ميصحش إل كلام ده الى اخره من الخرابيط إلى ما تودى و لا تييب

الى الان الاكذوبه و التى يكررها الكثير من الخرفان و هى
" الكويتى كسلان و مافيه شغل "

الحقيقه ان الكويتى مو كسلان ، الكويتى غير مشجع
مثلا انا فى الحكومه
لو اشتغل 365 يوم اعطى 110% بلا اجازه بلا مرضيه ولا يوم تأخير عن الدوام شنو يصير ؟
راح اخذ مكافئه اعمال ممتازه
خوش تقدير صح ؟
خطأ !
لانى لو اخذت 40 يوم اجازه دوريه و اسبوع مرضيات و اربع اجازات طارئه و تاخرت 20 يوم
و اعطيت الشغل 40% ( شويه اسهم ، سوالف ،ريوق ، مدونات احم احم )
راح اخذ نفس المكافئه !
مافى مقياس يقدر عملى
مافى دافع اعطى اكثر

بس شوف فى الشركات الخاصه ، فى تقدير فى عطاء

بس فى سبب ما فى احد وده يقوله
الكويتى اغلى

نعم الكويتى اغلى لان الكويتى يبى يعيش
مو ترف او خرابيط
يبى يسكن
السكن بروحه مصيبه
خل نعطى مثال حق وظيفه
لنفرض ان شركه و نسميها باء
باء تحتاج موظف ذو شهاده جامعيه

باء عندها الخيار بين كويتى و مصرى
الكويتى يبى يسكن مرته فى شقه مؤقتا و يبنى يبت فى المستقبل ( صار من الاحلام الحين طبعا ببركات السعدون )
يعنى على الاقل 400 دينار يمكن تعيشه
المصرى يبى ييمع فلوس و يمشى ، ساكن مع 5 عزابيه و يطلع عليه الايجار 50 بالشهر ، 250 توفى و تزيد

باء راح تأخذ المصرى اكيد ، توفير 150 بالشهر حلوه

هل الشركه بتفكر الكويتى شاغول او لا ؟ و لا بالمخ ، الـ 150 هى السبب بس مو عذر حلو فطلعو لك سالفه كسلانين

طبعا الكل يقيس على الحكومه فعبالهم الكلام صح

طبعا واحد من الخرفان مره قالى
" الكويتيين كسلانين ، نبى نوظف كم واحد حق شركه ابوى علشان النسبه ، قلنا لهم 300 دينار و تقعد بالبيت ( غير دعم العماله ) قالوا فوقه ، صج كسلانين "

قلته
"لو داوموا تعطيهم زياده ؟"
" طبعا لأ"

صراحه ما عرفت شقوله
اطقه ؟ اشوته ؟ كف على مخه يمكن يعدل العيار المفتلت فى صماخه

سؤال خارج الموضوع
احمد الصراف الكاتب بالقبس
قال فى مقالته اليوم

من أن ليس لنا أي مصلحة مع أي طرف من الأطراف الفائزة، أو التي ستفوز
بعقد
المصفاة الرابعة، والتي لا نعرف حتى كتابة هذه السطور والكلمات، حقيقة هويتها؟

اذا ما يدرى شفيه فى مقالته قبل قال الاخوان و السلف متهاوشين عليها ؟

وقد احتدم صراع شرس بين مجموعة من نواب احياء التراث، اي السلف، ومناوئيهم من
نواب الحركة الدستورية، الفرع المحلي للتنظيم العالمي للاخوان، اضافة الى
مجاميع اخرى للفوز بمناقصة مشروع المصفاة الرابعة

بابا ما تعرف لا تخربط

بعدين انا ما يذبحنى إلا كاتب بجريده يرد على كاتب بنفس الجريده

روح زوره بمكنبه و سولف معاه و فكونا

الأحد، 13 يوليو، 2008

صكووووه !

بعيد شوى عن اخبار الخواجات فى الكويت
الاسبوع الماضى قاعدين بالمطبخ بالشغل طايحين له فطاير
قام واحد من الشباب ياب طارى ان الخرافى شكله متحسف ان ما خذا سياره من المجلس بدل ما تدعم بوابه الاعلام سيارته
بعد فاصل من الضحك
قام واحد و علق و قال ان صالح الملا ما خذا السياره بعد من المجلس نقلا عن جريده الجريده ( شهال الاسم ؟ شنو بيسمى قناه التلفزيون مالته ؟ محطه المحطه ؟ اذاعه الاذاعه ؟ قهوه القهوه ؟ )
نط واحد و قال عيل سيارته صخر الى ما يبى سياره المجلس
طبعا ما صار اخر الاسبوع إلا و الملا صار له حادث
خل يحمد ربه المطير انى نسيت انه ما خذا سيارة المجلس و ما يبت طاريه ....

الخميس، 10 يوليو، 2008

تعال يا خواجه ، اصل احنا جزم منعرف حاجه

مع الاسف واضح ان هذا تفكير مجموعه لا بأس بها من الكويتين و ما اعرف شنو السبب

المشكله لو كل واحد شاف الكويتي الى يمه يشوف عبقرى
شوف شكثر شركات فيها كويتيين ماكو مثلهم ، احتلو الخليج اقتصاديا
انا ما اقول رئيس مجلس الإداره او مدير عام
انا اتكلم عن صغار الموظفيين

طبعا الجماعه الى عندى فى الحكومه مثلى الله يعينهم
لا الحكومه تحبهم و المدير الى صار له مليون سنه مدير ما يسمع إلا كلام خواجات ( مصاروه او سوريين )
و الترقيات ما تحوش الا الى مضبط المصاروه ( إلا من رحم ربى على قوله الاخ الزميل جار البارتشن )

امثله حلوه من مدونه الاخ بو مريوم
واحده من نيويرك

انا ما ادري ليش الاستهبال علينا...صحافة الكويت قامت و تقوم على حس اللبنانيين و المصريين و السوريين و بقية العرب. تبون تشوفون خير مثال للصحافة مع التكويت؟ شوفوا الوطن...ما اقول الا سف و تف عليها

ما ادرى الاخت شايفه الصحافه عندنا مستوى ؟ لا تقصون على عمركم و تخربطون هذا الكلام
جرايدنا ما كانت حتى تنشر اخبار كويتيه ، كانت جرائد ثوريه
السوريين المطرودين من سوريا يتكلمون عن سوريا و المصاروه عن الحصنى و هلم جرا ( مره ثانيه جمله بايقها من الاخ الزميل جار البارتشن ) ,
و الوطن الى تتف عليها عالاقل موظفه كويتين مو شويه فيز و مالهم سالفه

و الى مو شايف مشكله انه ينسمى زباله فهو زباله

ان لم تكن ذئبا بالت عليك الثعالب (مره ثالثه جمله بايقها من الاخ الزميل جار البارتشن* )

تكفون لا تقولون
حمدوا ربكم احد كتب عنكم موضوع

محنا طرارين

ليش محد حمد عمره لما قالوا نبى خمس و الحكومه قالت 10 ؟
ليش محد حمد عمره لما قالوا تصويت و ترشيح و حدس قالت تصويت بس ؟

بس لما نتمصخر حمدوا ربكم ؟
او لما نتمصخر من خواجات ؟

يعنى لو جمال حسين ( عفوا د. جمال حسين ) طلع بالتلفزيون و قال
تو الناس على تصويت المرأه

الجماعه اياهم بينشعمون ؟

لو طلع لبنانى و قال
اى لبنان حلو و بنقدر نضيفكم

الناس كلها تطير اهناك
اف خره هذى صارت

عالعموم المدير يبى تقرير ، خالنشوف شنو سالفته و نرجع

* ملعون الخير المفروض اكتب عنه موضوع ، بس خل يطلع اجازه مو راضى يعلم متى

الاثنين، 7 يوليو، 2008

الزياده وصلت و ما منها فايده

كتبت قبل 6 اشهر ان الموظفين دائما يبون زياده و كتبت ليش يبونها

الحين الحكومه زادت المعاشات بس ما منها فايده



اول شىء



الزياده ما تدش فى حسبه الاقساط ( يعنى تلش ، ما تزيد القيمه الى تقدر تقسطها )

البنك المركزى قلص نسبه الاقساط من 50% الى 40% ( يعنى قيمه قسطك اقل و معناه قيمه اجماليه اقل )

البنك المركزى قال ماكو مؤخر ( اقل قيمه اجماليه )

حسب قانون السعدون ماكو رهن ، يعنى ماكو بنك يمول شرائك لبيت


بس بالكويت الزياده تنقلب عايدى علينا

و اخرتها الحكومه تقول بتعطينا هديه بالتموين
هديه !!!!!!!
الحين صار لى 4 مرات و كل مره يطلع لى شىء ناقص
مره سكر و مره دهن و كله مرنا بعد اسبوع
و الحين الحكومه تقول هديه ؟ مو ناقص إلا تقول هديه حتى نفاذ الكميه

الاقليه الكويتيه فى الكويت

يمكن تقولون شنو هالعنوان المستهلك و لكنها الحقيقه

تلفت حولك فى اى مكان و دور الكويتيين



انا الحين قاعد اشوف خمه مصريين يسمونهم مستشاريين و كل الى يقولونه " ااااه ممكن يا سعاده البيه "



اطلع بره اشوف بنغاليه و صعايده و هنود و فلبن



حتى المدونات ادش الصفاه يطلع لى لبنانيين



شهالديره



لا و الحين المسخره يطلع لى محرر اجنبى يشك و يخيط ( مو شى جديد ) و يفتى بالسياسه الكويتيه

حلو حلو

عند كراكوتا الكويت

http://krakatoa-q8.blogspot.com/2008/07/blog-post_05.html



عند الشيخ ازيولايك

http://q8p.blogspot.com/2008/07/blog-post_05.html


عند الزومبى السابق

http://www.exzombiesm.com/2008/07/blog-post.html

بس تدرون ليش دائما يصير للكوتيين مثل هالاشياء ؟



لان الاغلبيه تفكيرها مثل هذا

http://www.frankom.com/?p=3198



واى , يوماه, حرام, مسكيين, فقير



هالخرابيط الى مالها سالفه

عمركم سافرتم مصر ؟ شفتم شلون يطقون سلام حق الامريكان و البريطانيين و حتى حق الكوريين و البولنديين

و احنا الخليجيين متمصخريين اخر مصخره

كل شىء 17 الف دبل علينا

تدخل متحف يأخذ من المصرى 5 قروش و من الخليجيين 5 دولارات

ليش ؟ ماكوا مساواه بالاجانب ؟ بس احنا الديره الوحيده الى المستوصفات زحمه و الحاله رديه و السبب الاجانب تارسينها

( يعنى الحبايب المستشارين كل واحد ريل بالقبر و ريل بالمكتب كم حبوب و ادويه يشفط ؟ )

ليش عقده الخواجه متأصله فى بعض الناس ؟

الخميس، 17 يناير، 2008

نبى فلوس! زيدونا

من الاشياء الى دائما يركزون عليها الموظفين فى الحكومه
هى زياده الراتب

و يمكن البعض يقول شتبون بالزياده من كثر ما تشتغلون اصلا
و فى بعض الصحه

و لكن المشكله ان الفرد الكويتى عنده خيارين
اما القطاع الحكومى او القطاع الخاص
القطاع الخاص يمكن رواتبه لا بأس فيها
و يقدرون الموظف و لكن لا تنسون انهم يطلعون القيمه منك بتسحيقك سحق

و القطاع الحكومى على كل عيوبه
و لكن لاتنسون انك تقدر تكمل دراستك و تقدر تجابل شغل ثانى بعد
مثل باقى الموظفين ( اسهم ، شركات سكاتى ) و تطلع لك كم فلس

طبعا ما جاوبت على السؤال
ليش الناس تبى زياده
الجواب سهل
الناس تبى تعيش
اى موظف حكومى لو جامعى يعطونه 450 دينار ( اساسى مو كادر ) و لو دبلوم 350 دينار
شنو يشترى هذا ؟
احسبها اقساط
حدك 50% من راتبك اقساط
يعنى الدبلوم حده 175 دينار قيمه القسط
اى 10500 مجموع الاقساط
و هذا يقلل جدا السيارات التى ممكن يشتريها الموظف

شىء اخر
لو تبى تشترى بيت مثلا
مالك امل براتبك البائس
لان البيوت اسعارها فوق فوق
و الاراضى اضرط

ما هذا ! موظف فاضى ! ياللهول

طبعا معجزه
موظف حكومى فاضى
شلون ؟
عبالكم كل الموظفين عندهم شغل ؟

يمكن تسألون ( لو احد يقرأ المدونه ) شتبى ؟

اقولكم شنوا ابى
ابى اقضى وقت