الولاد راحوا في طوكر

شفيهم المدونيين قاموا يختفون فجأه ؟



مقهور ( وراء الكواليس ) اختفي فجأة و انشالت المدونه بعد ما حط صورة لمسئول في الداخليه

ازيولاك ( از يو لايك ) اختفي فجأة و صارت مدونته مقفوله

زومبي سابق ( زومبى سابق ) ما تطلع مدونته



شالسالفه ؟ من الوطن و الدار بدت تغطي المدونات اشوف الزينيين يختفون ؟

ليه ما تروح هناك ؟

الاخ اللطيف عاب ( اختصار )
كاتب اليوم يمدح بالبنغلاديشيين و يقول كلام مثل

بعنصريته غير المقبولة تجاه جنسية تضم اكثر من مائة مليون مخلوق بشري منسوب لهم
إنجازات، لم يقم بعُشرها 300 مليون عربي متبجح بأصله وفصله، وبأنه من خير أمة أخرجت
للناس!

هذه هي بعض من إنجازات بني بنغال للعالمية جمعاء.. فما هي إنجازاتك يا كويتي (أو
خليجي) متبجح شاتم للبنغال؟

و اقول له و لكل اهبل يفكر مثله
هذول ما بدعوا في بنغلاديش و لا حتي انولدوا فيها
الاصل ماله سالفه و مافي احد يعتد فيه
اذا اي واحد منهم فاز بنوبل ما يقولون بنغلاديش ، يقولون ديرته الي انولد او يحمل جنسيتها

بعدين خير امه مو احنا الي قلناها
الله عز و جل قالها إلا اذا كان كتاب الله مو عاجبك ( مو بعيد عليك )

كُنْتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ
وَتَنْهَوْنَ عَنِ الْمُنْكَرِ وَتُؤْمِنُونَ بِاللَّهِ

الاسراء 110

لا و الحبيب يقول 300 مليون ما طلع منهم شيء
و انت بتلعب لي سالفه الاصل و الفصل

ترا الي اصلهم عرب ما يخلصون ، بس ما نتفاخر فيهم لانهم ما ابدعوا عندنا ولا اسهلها اقولك احمد زويل و مجدي يعقوب و اللبناني الي اخترع الايبود و غيره وايد


في سالفه ثانيه
اذا وزير الداخليه يقول انه ما رد علي البراك لانه الرأي القانوني يقول انه ما يرد شفيه رد علي اسيل ؟ ولا علشان معجب ؟
و اذا الرد مافيه شيء و علي قولته راد علي الباقي شفيه ما رد علي البراك ؟
بتحطو نفسكم في مواقف بايخه

الست مش حاتيجي الشغل النهارده

و لا باكر و لا بعده و لا السنه القادمه اذا الخبلات مشو قوانينهم

من جريده الجريده

أكدت النائبة د. معصومة المبارك أن لجنة شؤون المرأة والطفل البرلمانية وافقت في اجتماعها أمس على زيادة أيام إجازة الوضع إلى 70 يوماً، إضافة إلى منحها إجازة إضافية لمدة 4 أشهر براتب كامل، مشيرة إلى أن الموظفة لها الحق في طلب 6 أشهر أخرى بنصف راتب.

70 يوم ؟ يعني شهرين و 10 ايام ، و يخلون الامومه بلا خصم ؟! ( الان نص راتب ) و فوقها 6 اشهر بنص ؟
يعني 14 شهر !! سنه و شهرين ؟!؟

مصرقعين ربعنا ؟ بنصير اقوي من الدول الاسكندنافيه مثلا ؟
شنو سنه ؟
منصجكم ؟
ندرب موظفه و تطس سنه ؟

لا تقولون ما تأخذ النص راتب ، الكل يأخذها الحين

بعدين يقولون ليش الوزارات ما تبي موظفات

لا و تبي حضانه بكل وزاره ...

احنا غرف زقاير مو لاقين يقولون لنا طلعوا برا دخنوا تبين غرف حضانه !!!
في ناس مو لاقيه مكاتب تبين غرف حضانه !!!

عاد اكو وزارات الله اكبر
يدش الياهل ما يطول 5 دقائق تسمم او سرطان

الواد ده ساحر يا جماعه !

شيء ما يصدق و لا يدخل العقل و لا المنطق و ماله تفسير

لجنه الظواهر السلبيه و هايف

كل سلبيات اللجنه مثبته علي هايف من وجهه نظر بعض الاشخاص و الجرايد
مثلا جريده الجريده العنوان الرئيسي

الظواهر السلبية تفرض قيودها على المجتمع الكويتي وتقر ضوابط هايف للمقاهي والمطاعم و المايوه النسائي

يوم قرأته استغربت ، من كأن اللجنه رئيسها و مقررها شيعه و قالوا بغيرون اسلوب اللجنه و ماراح يسوون الي كان يسويه هايف
و الناس هيه هيه و طايحه له شماته بهايف و مستانسه انه ماراح يمشي شغله مثل اول

شلون مشت و وافقوا علي ضوابط هايف ؟

كملت الخبر و انصدمت

واستندت مقررة اللجنة النائبة رولا دشتي في تأكيداتها على أن عملية التصويت التي
تمت على الاقتراحين المقدمين من النائب محمد هايف امس غير قانونية، الى عدم اكتمال
النصاب في الاجتماع خلال التصويت، مشيرة الى أنها غادرت قاعة اللجنة قبل التصويت
'ولم يشارك في التصويت سوى رئيس اللجنة وعضوها النائب حسن جوهر، وبذلك يكون النصاب
غير مكتمل ولا أثر للقرارات المتخذة'

رئيس اللجنه الدويسان
و حسن جوهر

يعني حتي هايف ما صوت علي مقترحاته

بعدين شكو مغادره القاعه قبل التصويت ؟ داشه اللجنه علشان تغادرين بسلامتك ؟

لا و الحلو الثاني خربها

وفي حين أعرب النائب صالح الملا عن تقديره لدور رئيس وأعضاء لجنة الظواهر السلبية

ياروح امك ترا الي صوت علي القرار الرئيس و عضو غير هايف

انا ابي رجل يطب بالاعضاء الي صوتوا للقانون ، طبعا ادري خاموووووووووووش
بس بيطبون بهايف كالعاده

زي القرع يمد لبره

إلا هذا خبر ؟
افتح القبس و الاقيهم حاطين

"الخدمات الصحية متخلفة.. والمطلوب تغيير جذري"

احلف ؟ قول والله ؟ ما ادري شكثر معطينك فلوس ( شكلها ملايين ) علشان تقول لنا الخدمات الصحيه مو شىء ؟
هل احنا ما نعرف ؟

صج عنز الفريج ما تحب إلا التيس الغريب

ايه الفزوره دي

عندي لكم فزورتين
و خل نشوف منو يقدر يحلهم

الفزوره الاولي

عاب ( اختصار لإسم كاتب بالقبس )
كاتب هالجمله

الحلقة الرابعة من البرنامج الكوميدي الشيق «صوتك وصل»

بعدها بكم فقره

أخطر ما عرض في تلك الحلقة هو امساك مثل هذه الحركات بتلابيب مؤسسات رسمية خيرية
كويتية

و الفزوره
شلون برنامج كوميدي تستمد منه حقائق لا جدال فيها ؟


الفزوه الثانيه

بيت التمويل الكويتي
الامانه العامه للأوقاف

لو تسأل كل كتاب الليبراليين راح يتفقون علي شيء واحد

ان الاخونجيه يسيطرون عليهم

انزين

طلال السعيد بقناه سكوب ما عنده إلا الاخونجيه و طاب و لاعن خيرهم

انزين

شركة الخدمات العامة

بيت التمويل الكويتي يملك 80 بالمائة و الأمانة العامة للأوقاف الكويتية 20 بالمائة
( من موقع الشركه )
http://www.psc.com.kw/arabic/overview.php

منو رئيس مجلس إداره الشركه ؟

طلال عثمان مزعل السعيد

( من موقع غرفه التجاره )

و الفزوره
شلون يطب فيهم وهم رازينه ؟

العيد هل هلاله

من مصدر واصل

اذا كمل رمضان 30 يوم
معناه الاحد يصير يوم 30 من رمضان
و يوم 30 رمضان راحه

العيد يصير الاثنين
و إجازه العيد 3 ايام

الاثنين و الثلاثاء و الاربعاء

الخميسيطيح بين عطلتين العيد و الجمعه فيصير عطله

و نعطل الاسبوع كله !!

الحين التراويح كلها دعوات علشان نكمل رمضان

حق الاجر